10 n tɣawsiwin i tzemreḍ ad tent-xeddmeḍ deg uxxam akken ad tefkeḍ afud i tneflit n umbiwel n ugrud.
Seg tazwara, heggi srir ɣer lqaɛa, ideg ara yembiwel ugrud deg tlelli deg texxamt war iɣeblan n tɣellist.
Tagertilt n umbiwel, ad teǧǧ agrud ad yesnerni ifsugen n yiḥricen unnigen n tfekka-s. Sbedd lemri metwal-is akken mi ara yettwali iman-is deg lemri amek i yettembiwil, ad irnu ad ijebbed iman-is d ayen ara yesnernin ifsugen n temgerḍt-is.
Ɛelleq irellucen sennig tqerruyt n ugrud, maca ur ilaq ara ad asent-yaweḍ. Akken ad tent-yennam u ad yerr ddehn-is ɣur-sent amek ttembiwilent. Mi ɛeddan kra n wgguren, sebɣes-it akken ad yennal u ad yeṭṭef kra n urelluc ara tɛelqeḍ nnig-s. Wali amek ara t-yeṭṭef d wamek ara yetturar yis-s.
Fren iselsa iwulmen ara iɛiwnen agrud akken ad yembiwel s shala. Tiserwula tugzimin, yettnejbaden, tičeqcirin tiḥmayanin d yiselsa xfifen. Lebɣi-s n daxel akken ad yessembiwel tafekka-s d yigmamen-is yettwarez mi ara yels iselsa ẓẓayen ara t-iqarɛen deg umbiwel ines.
Slal-d tignatin i umbiwel. Mi ara tserseḍ tiɣawsiwin ggugent (beɛdent) ɣef wanda akken yella ugrud, annect-a ad t-isegger akken ad yennejbad, ad iḥbu, ad imured. S imal yettnerni, efk-as tibalutin akken ad yeddu s lemɣawla.
Ḥader iselsa i yettqaraɛen ambiwel n ugrud. Tijerrayin, timeccayin, … ttqaraɛent agrud akken ad yembiwel deg tlelli. Tiɣawsiwin-a ttaǧǧant agrud ad yeqqim neɣ ad ibedd neɣ ad yelḥu send akk ad yeɛreḍ tumert n mi ara yizmir ad yexdem tilufa-a iman-is mebla tiɣawsiwin-a.
Slal-d tawennaḍt yeldin d umaḍal zeddigen, ideg ara yebdu ugrud ad yettmurud neɣ ad ileḥḥu u ad yizmir ad ibedd iman-is. Senṭeḍ tancirt n usɣar ɣer lḥiḍ akken ad ittejgugul deg-s ugrud u ad yettnejbad ɣef usawen.
Af-d amkan ideg yezmer ad yelmed ad yettali tirkabin, ma ulac asellum, selmed-as ad yettali tidrujin.
Af-d tawennaḍt ideg yella umkan wessiɛen i umbiwel : inurar n wurar, tizeɣwa n jimnaz, urtiyen d yiqusisen n tdawsa. Rnu heggi aṭas n tɣawsiwin xas ẓẓayit cwiṭ akken yizmir ugrud ad tent-yerfed.
Sexdem tameccayt. Efk akud ilaqen i ugrud akken ad yelḥu, acku yezmer ad yelḥu aṭas ma truḥeḍ-as s leɛqel ur t-teḥriseḍ ara.