Heggit-d annar irekden, ideg ulac lḥess akken ad yili umeslay
- Ilaq d ssut n yimdanen kan ara isell, ur stuqqutet ara ssut n tiliẓri (tilivizyu) d leswat n rradyu, n uselkim d tilifun.
Snamet i ugrud tameslayt s umeslay d tmesliwt i wayen i d-yeqqar
- Mi ara txeddmem tilufa-nwen d ugrud, ttmeslayet-as akken ad yeqqen ayen i as-teqqarem ɣer wayen i txeddmem yid-s yal ass. Mi ara yettwali amek i tettḥerrikem icenfiren-nwen mi ara tettmeslayem, annect-a yettɛawan-it akken ad iheggi tiḥnikin-is, ticenfirin-is, taqemmuct-is d taɣect-is akken ad d-yessenṭeq leswat i wumi yesla.
- Ttarrat-as s yimeslayen i ugrud mi ara yesbujɣud amzun akken d ameslay i d-yettmeslay yid-wen. Mi ara as-tsellem u ad as-tettarram i leswat-is, ad d-teslalem amelay gar-awen, annect-a yettɛawan-it akken ad ikemmel ad d-ixeddem leswat. Ma yella imawlan ur as-ttarran ara mi ara yesbujɣud, ad iḥbes ur yettkemmil ara, dɣa ad as-yaɛer ad yemmeslay.
Afet-d lweqt i umeslay
- Yeshel ad d-tafem lweqt akken ad temmslayem d ugrud u ad teslem i tririyin-is. Tezgam yid-s ṭul n wass, ihi ttemmalet-as xersum ayen akk i txeddmem, am uslusuy n lqecc-is, aheggi n uɛwin-is, neɣ tirza ɣer ssuq. Ad tafem dakken annect-a ur yuḥwaǧ ara aṭas n lweqt-nniḍen.
