Leqdictat sdat uxxam
Ur nḥemmel ara ahat abraz n uxxam neɣ tarda n leqcuc, maca argud iḥemmel ad yexdem lecɣal-agi, mi ara yettɛawan imawlan-is ad iḥus s yiman-is d aɛeggal deg twacult diɣen d amasay n lefɣayel-is.
Swejdem-d amkan anda ara yetturar ayen i yebɣa ugrud.
Agrud iḥemmel ad yexdem ayen i txeddmem. Annect-a yettaǧǧa-t ad yefhem tudert ideg yettidir. S wannect-a yettḥulfu s laman imi icudd ɣer tudert. Ibeddu ifehhem lfayda n wayen i ixeddem.Leqdicat i iḥemmel ugrud dewwiren deg snat n tɣawsiwin. Tamezwarut ad yeɛreḍ ad ittḥadar acku yettḥulfu s tlelli deg leqdic-a. Tis snat d ayen i t-yesseqraben ɣer uxxam-nsen d twacult-is. Ad yebdu ad yettwali tawacult amek tettidir. Ayen iḥemmel ugrud ad t-yexdem deg uxxam :
- Tunnḍa, abraz, asizdeg, asired
- Abeṭṭen n yiselsa
- Asewjed n wučči, aheggi n lmayda, asired n leqcuc
- Abraz deg tebḥirt, uẓẓu n yimɣan, tukksa n tjeǧǧigin
- Arebbi n yiɣersiwen, d usečči-nsen
- Asewweq, aqeɛɛed n wučči deg leqjur
- Ad yesɛu timeṣlaḥt tamecṭuḥt, acifun, tacabcaqt,…
- Sersem-ten deg leqjer arxayan anda yezmer ad ten-yaweḍ, ad yishil ad t-yeldi.
- Swejdem-d takursit taxfafant i isehlen i uḥerrek, ad tt-yettawi yid-s ma yuḥwaǧ-itt deg leqdicat-is
Seknem-as amek ara yexdem lecɣal-agi
Tzemrem ad as-tseknem i ugrud amek txeddmem aṭas n lecɣal deg uxxam.- Sfehmet-as s leɛqel, yiwet yiwet mi ara as-temmalem amek ara yexdem kra.
- Ilaq ad tḍefrem tarrayt i isehlen i usefhem
- Ur ttmeslayet ara mi ara teskanayem i ugrud amek ara yexdem kra n ccɣel
- Init-as i ugrud amek ara yexdem kra n ccɣel, maca inim-as-t s wawal kan, syin akkin s yifassen. Ur ten-xeddmet ara deg yiwen n lweqt, akken agrud ad isel qbel syin ad imuqel ar yifassen amek txeddmem ccɣel-nni.
- Ad yelmed s wallen d useḍṣu akken ad ur iɛeggu ara ugrud, yerna ad yelmed s sshala.
- Eǧǧet agrud ad yeɛreḍ iman-is
- Seg tazwara, tzemrem ad t-ɛiwnem deg leqdic-nni, syin akkin ad t-teǧǧem ad ikemmel iman-is.
- Beɛdet fell-as cwiṭ cwiṭ akken ad yexdem iman-is.
Rebḥem-d lweqt
- Agrud ur ixeddem ara am yimeqqranen d ayen ibanen, kra n lecɣal ad as-ṭṭfen aṭas n lweqt, yezmer ur yettwenniɛ ara akken i ilaq, ad yeǧǧ aman neɣ kra.
- Tikwal ur tettizmirem ara ad as-tefkem lweqt i ilaqen i ugrud akken ad yexdem leqdicat i yebɣa, maca yelha i usnerni-s. Nuḥwaǧ akk lweqt akken ad nexdem kra n leqdic, akken ad iwenneɛ. Annect-a ur yemgarad ara d yigerdan, ula d nutni uḥwaǧen lweqt akken ad siwḍen ad segmen lecɣal-nsen.
