Imenzayen n Montessori

Anekmar asensegmi n Montessori yebna ɣef waṭas n yimenzayen igejdanen :

Igerdan sɛan isran yemgaraden deg talliyin yemgaraden deg tudert-nsen

Montessori tebḍa tudert n ugrud ɣef ukkuz n talliyin : talalit ar 6 iseggasen, 6 ar 12, 12 ar 18, 18 ar 24.

Aṭas n yimusnimanen i d-yesbadun talliyin-a, maca anagar Montessori i d-yefkan allal i tegzi-nsent i yellan d allal n usedwel, s wakka i tettwali asedwel d « Tallelt i tudert » ɣef waya, ma nefka tallelt i tneflit tagamant n yigerdan deg yal tallit, d tallelt i tneflit n umdan s lekmal-is. Tenna-d dakken, yal agrud yesɛa tallit taxatart deg tudert-is ideg yezmer ad yezger seg tallit n tneflit-is ɣer tayeḍ. Ɣef waya, ilaq igerdan ad farsen tignatin-a deg lawan-nsent akken ad awḍen ɣer yiswi-nsen.

Igerdan sɛan tarrayt d tamxaleft akken ad lemden

Di teɣzi n 6 n yiseggasen imezwura n tudert, allaɣ yettarra lwelha-s ar wayen akk i as-d-yezzin. Ihi agrud amecṭuḥ yezmer ad yelmed tutlayt i as-yehwan u ad yekcem deg yidles i as-yehwan s wayen kan i iwala deg tudert-is. Montessori tettwessi akken ad nressi mliḥ ɣef usedwel deg 6 n yiseggasen imezwura n tudert, acku deg tallit-a agrud ilemmed s sshala.

Igerdan sɛan isran igmawiyen akken ad lemden

Segmi ara d-lalen, igerdan ttarran ddehn-nsen ɣer wayen akk i asen-d-yezzin. Ttnadin anamaek uffir seg wayen akk i ttidiren, bɣan ad ilin d ilelliyen, ttnadin allal swayes ara qqnen ɣer yimdanen i asen-d-yezzin. Ttwanecden akken ad nallen tiɣawsiwin s yifassen-nsen akken ad ẓren dacu-tent, ad rren lwelha-nsen mliḥ ɣer leqdic i ten-yettrajun, ad as-d-ttɛawaden acḥal d tikkelt akken ad igerrez. Lḥir-a yekka-d seg tigawin tigamanin i sɛan yimdanen si teɣzi n tudert-nsen u d ayen i yettɛawanen igerdan akken ad nnernin u ad nnamen amaḍal-sen amaynut.

Igerdan sɛan ṭṭwiqan n tegnatin akken ad lemden

Igerdan ttɛeddin-d ɣef kra n talliyin ideg ttḥulfun mliḥ s wayen i asen-d-yezzin. Deg 6 n yiseggasen imezwura n tudert, ad ttnadin kra n urmud ara ten-iɛiwnen akken ad lemden tutlayt-nsen, ad sdukklen tikliwin-nsen, ad d-slalen tanafut ara yefen anamek i umaḍal-nsen. Talliyin-a ttfakkant mi ara sɛun 6 n yiseggasen. Anekmar Montessori iressa ɣef tallelt n uwitay n tneflit n yal agrud iman-is di teɣzi n 6 n yiseggasen-a imezwura.