Rreḥba n yiseqsiyen ɣef umeslay n yigerdan

Timeccaḥin lhant neɣ diri-tent akken ad yelmed ugrud-iw ameslay ?

Mi ara sganayeɣ agrud-iw, xeddmeɣ-as tameccaḥt deg tqemmuct-is akken ur itettru ara. Maca sliɣ qqaren-d dakken diri-tt, acku tezmer ad t-qareɛ deg usnerni n umeslay-is. D tidet neɣ ala ?

Aɣerbaz Le Royal College of Speech and Language Therapists (RCSLT) yenna-d dakken tisusatin d tmeccaḥin diri-tent, ladɣa mi ara yebdu ugrud ad yesbujɣud, acku mi ara tili tmeccaḥt deg yimi-s ad t-tqareɛ akken ad iḥerrek iles-is, ticenfirin-is, d tɣesmart-is, ihi ad as-tekkes asbujɣed i yesɛan azal ameqqran deg ulmad n umeslay. Ihi deg useggas amezwaru n ugrud, mi ara yebdu ad ikeccem deg umeslay, u ad d-issuffuɣ leswat-is imezwura, ur as-tlaq ara akk tmeccaḥt neɣ taɣawsa-nniḍen deg yimi-s.

Tutlayt s uwehhi tettɛawan agrud deg umeslay ?

Sliɣ dakken yelha ad teslemdeḍ i ugrud tutlayt n uwehhi akken ad yizmir ad ad-yini ayen i yebɣa uqbel akk ad yebdu ameslay. Bɣiɣ ad ẓreɣ ma d tidet neɣ annect-a yettqaraɛ-it akken ad yissin ad yemmeslay s wawal.

Llan wid i d-yeqqaren dakken yelha ad tettmeslayeḍ i ugrud s uwehhi ladɣa i ugrud i mazal ur yettmeslay ara ɛad. Wid yugin rray-agi, ttwalin dakken awehhi yessenqas lebɣi n ugrud akken ad yebdu ameslay s wawal. Ulac dacu i yifen mi ara yili umjadal gar ugrud d yimawalan u agrud ur ibeddu ara ameslay alma yesla i wawalen. Imawlan ilaq ad myekcamen mliḥ d yigerdan akken ad fehmen dacu i bɣan ad t-id-inin mebla ma sxedmen awehhi. Rnu xas ad yili cwiṭ kan n uwehhi maca ilaq ad t-id-yeḍfer umeslay.

S wanta tameslayt ara mmeslayeɣ d ugrud ?

Argaz-iw d arumi, ma d nekk ttmeslayeɣ tagnizit. Nebɣa limer agrud-nneɣ ad tent-yissin i snat. Dacu ur neẓri ara amek ara nexdem akken ad yeḍru waya, amek ara nexdem ?

Igerdan mi ara yilin d imecṭuḥen zemren ad lemden akk tutlayin i wumi sellen. Ihi ma tebɣam agrud-nwen ad tent-yettmeslay i snat, ilaq ad asent-isel i snat. Ayen yelhan, ilaq yal yiwen ad yettmeslay s tutlayt-is n tyemmat yerna ad tt-ihedder kken ilaq. S wakka, agrud ad kecment deg-s i snatyerna ad isseɛdel gar-asent war ugur. Tikwal, yezmer ad yelmed yiwet n tmeslayt s lemɣawla wala tayeḍ, neɣ tikwal ad yagi ad yemmeslay s kra n yiwet seg-sent xas ifehhem-itt. Dacu kunwi ur ilaq ara ad tḥebsem. Ilaq ad as-tettmeslayem s tmeslayt n tyemmat xas netta ad awen-d-yettarra s tmeslayt-nniḍen. ɣer sdat, ad yefhem ayen i xeddmem akken ad as-tefkem lsas iseḥḥan deg snat n tmeslayin.