Ɣer timucuha, cnu tizlatin

Snulfut-d amaḍal yeččuren d timucuha d tezlatin

• Serset tamkerḍit deg texxamt-is neɣ deg tmesrit anda yezmer ad isres kra seg yidlisen-is i ihemmel u tzemreḍ ad tent-tettbeddileḍ s yimaynuten yal ssmana. Idlisen ilaq ad rsen amek ara d-tbin tjellabt-nsen mačči s uɛrur. Annect-a ad t-iɛiwen akken ad yaf adlis i yettnadi s sshala imi tteswira n tjellabt ad d-tejbed lwelha-s.
• Idlisen ilaq ad d-ttawin timucuha tifessasin ɣef tudert n tidet d wayen akk i d-yezzin i ugrud mi ara yeffeɣ yid-wen ɣer lexla neɣ ɣer tḥuna. Ilaq ad cuddent ɣer yimdanen i d-yettmaggar deg tudert-is, am tirza ɣer umejjay neɣ ɣer ṭṭbib n tuɣmas. Ur as-laqent ara tektabin yessewhamen tura. Acku yuḥwaǧ ad yefhem tudert n tidet u ad yefhem dakken imdanen ur ttafgen ara neɣ iwaɣezniwen ur llin ara deg tidet. Timucuha yessewhamen ad rwint allaɣ-is deg leɛmer-a.
• Tiqsiḍin ilaq ad ilint d tid yettwessin ɣer wayen yelhan. Ur as-ttakket ara idlisen i d-iḥekkun ɣef warrac i yesɛan yir tikli. Igerdan deg leɛmer-a, ad ttɛanaden ɣur-sen dɣa ad ḥefḍen yir tikli ɣur-sen.
• Ur as-ttakket ara idlisen ara yessiggden agrud deg leɛmer-a, am tmucuha ɣef leḥwayeǧ i izemren ad frent deg ṭṭlam. Ma yella ur d-tessfehmem ara ṭṭlam bli d ayen yessaggaden, agrud yezmer ur yettaggad ara.
• Afet-d idlisen n tezlatin i tzemrem ad tent-tecnum lwaḥid, ad tettwalim tteswirat u ad teṭṭafarem lqafya i d-yettuɣalen yal tikkelt akken ad yebdu ugrud ad d-yettales awalen.
• Afet-d tizlatin isehlen i yesɛan tigawin i tzemrem ad txedmem kunwi d ugrud-nwen. Turart s yiḍuḍan anda tzemrem ad tesxedmem iḍuḍan-nwen akken ad txedmem kra n tigawin (lefɛayel)ad ad d-yejbed lwelha n ugrud i yessnen ad yessexdem ifassen-is kan.

Qqnet agrud-nwen ɣer tmucuha d tezlatin

• Mlet-as amek ara yetti (yeqleb) tiwriqin n tektabt, sfehmet-as asurif asurif teṭṭfem taktabt s lemḥadra d leqder n yiman-nsen.
• Deg tallit-a, tzemrem ad tesxedmem tteswirat n kra n udlis akken ad d-tesneṭqem agrud-nwen u ad as-teslemdem awalen imaynuten. Seknet-as tteswira n uqjun, tinim-as : « d acu-t wa ? », rajut ad d-yefk tiririt, ma ilaq , init-as : « d aqjun ». ma yella yessen awal-a, ɛiwdet-as-d : « ih, d aqjun ». ma yenna-d : « d amcic », sḥefḍet-as awal-nni s rẓana : « ih, d aberkan am umcic-nneɣ, maca wagi d aqjun ».
• Cnut yal ass d ugrud-nwen. Sɛut agbur yelhan n tezlatin, d ccnawi d tuɣac ideg yella uḥerrek akken ad iɛaned ugrud ad d-yernu ɣur-wen u ad yecnu yid-wen.

Afet-d lweqt akken ad teɣrem u ad tecnum d ugrud-nwen

• Afet-d amkan d lweqt ideg ara teɣrem ad yili d tagnit n usteɛfu deg wass ladɣa uqbel ad teṭṭsem deg yiḍ. Heggit idlisen mi ara truḥem ɣer kra n umkan, deg tkerrust, neɣ deg lkar neɣ mi ara tilim deg tzeqqa n uraju ɣer ṭṭbib, akken ad tessedhum agrud s tɣuri.