Ili d amaẓlay

Xdem-d tawennaḍt ideg ara yeḥsu ugrud s wayen ara yeḍrun ar sdat d wamek ara t-temmagreḍ.

Ilaq ad teḥsum belli s yisem-nwen d imawlan, d kunwi i d imasayen u d kunwi kan i izemren ad teẓrem anti tilisa i iwulmen i twacult-nwen. Maca asmi ara teḥsum anta tilisa i ilaqen, ilaq ad tilim d imaẓlayen deg yal tikkelt. Igerdan ttḥulfun s laman mi ara d-txelqem tannumi d tlisa yelhan. Agrud yettnuɣni asmi ara t-teǧǧem ad yexdem kra ass-a, maca ad as-tagim ad tt-yexdem azekka.

Snamet i ugrud ad yissin tilisa-s, tilim d imaẓlayen yal ass

Aṭas n wuguren ara tekksem ma yella txedmem tilisa timaẓlayin ara yesnamen i ugrud ad yeggan deg yiwen n lweqt, ad ad isett deg yiwen n lweqt, d wakud ara tesɛeddayem akken d kra n tegnatin akken ad yennecraḥ u ad yurar di berra.
Ur yeshil ara i ugrud ad iɛeddi seg leqdic ɣer wayeḍ, ɣef waya i ilaq ad d-txelqem kra n leɛwayed ara iɛiwnen agrud akken ad iẓer dacu ara yexdem ar sdat. Amedya: mi ara d-teddmeḍ aḍellaɛ, lmeɛna-s, ad teffɣem seg uxxam u ad truḥem ɣer tḥanut akken ad d-teqḍum. Mi ara d-trefdeḍ aqrab-is, lmeɛna-s d lawan ad iruḥ ɣer uɣerbaz. Mi ara as-d-teɣreḍ tamacahut, deg yiḍ mi yekkfa tuccfa, lmeɛna-s d lawan ad iɛeddi ad yeṭṭes. Tigawin-a ttɛawanent agrud akken ad iẓer dacu i d-itteddun, annect-a yessenqas uguren.

Agrud ur nesɛi ara ɛad 3 n yiseggasen, ur yezmir ara ad imeyyez, ihi yessutur-d akk ayen i yebɣa. Ur yezmir ara ad yefhem ayen yelhan d wayen ur nelhi. Ihi d kunwi ara as-ixedmen tilisa. Igerdan uḥwaǧen ad ḥussen deg laman ay llan deg tallit-a. Xas ur asen-yetteɛǧab ara lḥal, ilaq ad ḥussen belli d kunwi i yettrayin fell-asen mačči d nutni mi ara ten-tqarɛem ur zeggren ara abrid neɣ ur ttazzalen ara deg tḥanut. Tagnit ara d-yeglun s twaɣit ilaq ad tilim tuɛrem deg-s : “Tura ad k-awiɣ u ad nuɣal s axxam”. Asmi ara ḥsun yigerdan belli d tidet ad tt-txedmem, ttaɣen awal. Annect-a yettɛawan mi ara teḥsum belli agrud yettjerrib-iken akken ad yissin tilisa-ines ma yella d tidet ad teṭṭfem deg wawal-nwen yerna ilaq ur tettuɣalem ara deg-s xas ur iqebbel ara neɣ ur as-itteɛǧab ara lḥal.

Efk-as lweqt

Asmi ara txedmeḍ tilisa ur yeshil ara ad teṭṭfeḍ deg-sent. Tikwal mi ara nili neɛya neɣ nennuɣna neɣ nella deg berra gar madden, dɣa nettak-asen aẓuɣer ad xedmen ayen i bɣan. Maca ɣer Taggara, d kunwi ara iḥekmen ma yella ur tuɣalem ara deg wawal-nwen. Skud tellam d imaẓlayen, skud agrud ad yettnam tilisa n twacult-nwen. Yal mi ara teǧǧem agrud ad yexdem akken i yebɣa acku d annect-a i isehlen, ad yenwu ugrud dakken tilisa-nniḍen akk yezmer diɣen ad tent-yerreẓ. Asmi ara yefhem ugrud belli yezmer ad yemjadal yid-wen ɣef tlisa, yal tikkelt ad d-tettafem iman-nwen tettemjadalem yerna s umata agrud yettaweḍ lebɣi-s s yimeṭṭawen d leɛyaḍ.