Rreḥba n yiseqsiyen ɣef umeslay n yigerdan seg 18 ar 24 n wagguren

Iɣeblan yerzan lmenṭeq

Agrud-iw yessaweḍ sin n yiseggasen, yezga yettmeslay yal ass, maca aɣbel ur ssawaḍeɣ ara ad fehmeɣ dacu i d-yeqqar. Bɣiɣ ad t-ɛiwneɣ akken ad d-yessenṭeq awalen akken ilaq, d acu ur ẓriɣ ara amek ara as-xedmeɣ, d acu i ilaqen ?

Agrud ilemmed ad yemmeslay mi ara isel amek i ttmeslayen wid akk i as-d-yezzin. Itteḥsis-am-d u yekkat ad d-yenṭeq akken i tneṭqeḍ kemm. Asenṭeq n leswat d umeslay yelhan icudd ɣer waṭas n temsal, ladɣa amek i nettḥerrik icenfiren-nneɣ, iles-nneɣ d taɣect-nneɣ u tigi akk uḥwaǧent lweqt akken ad nnernint. Ayen akk i yuḥwaǧ ugrud akken ad t-tɛiwneḍ, ilaq ad awen-d-isel tettmeslayem akken ilaq d waṭas n tegnatin akken ad yemmeslay netta. Ur as-sseɣtayet ara ma yella ur d-yenṭiq ara akken ilaq, acku ur yezmir ara ad d-ynṭeq akken ilaq ama yella ur yewjid ara. Ma yella tḥebbsem-t-id yal tikkelt ad as-iruḥ laman deg yiman-is akken ad yettwafham. Ihi sellet-as kan, theddrem-as, ayen nniḍen d lweqt ara tt-yefrun.

Afran n yidlisen

Anwa idlisen i ilaqen i ugrud i yesɛan 18 n wagguren. Ttruḥuɣ ɣer tnedlisin n yigerdan, ttafeɣ aṭas n lesnaf, maca yettaɛer-iyi akken ad d-xtireɣ idlisen iwulmen leɛmer-a.

Agrud mi ara yesɛu 18 n wagguren, deg wayen yerzan ameslay, yuḥwaǧ ad d-yaf ismawen n tɣawsiwin akk i as-d-yezzin. Yeffud awalen deg tallit-a, daymi idlisen d agerruj lɛali akken ad yissin aṭas n wawalen yemxallafen. Ihi idlisen i as-ilaqen deg tallit-a d idlisen i d-iḥekkun tiqsiḍin ɣef wayen i yettidir deg tudert-is n yal ass am tuffɣa ɣer lexla, rwaḥ ɣer tḥuna, timelsiwt n lqecc, turart d watmaten neɣ d yimeddukkal, tirza ɣer yimɣaren, arkab n lkar neɣ n tmacint neɣ tiɣimit rrif n lebḥer neɣ d wurti. Ad as-ɛeǧbent tektabin-a, acku ad yaf deg-sent ayen i yessen yakan deg tudert-is. Ad t-ɛiwnent akken ad yefhem tudert-is netta s timmad-is yerna ad as-d-fkent amawal (awalen) i yuḥwaǧ akken ad tt-id-yewsef. Tiktabin ɣef teqsiḍin yessewhamen ur as-wulment ara tura acku mazal ur iferrez ara gar tidet d lekdeb, ihi ilaq ad as-ternum tafat i tudert-is mačči d asmundel ara t-tesmunedlem.