Rreḥba n yiseqsiyen ɣef umeslay n yigerdan seg 2 ar 3 n yiseggasen

Wissen tiliẓri (télé) ma tettɛawan agrud deg tmeslayt ?

Agrud-iw iḥemmel aṭas ad iferreǧ tiliẓri. Di tazwara ttaǧǧaɣ-d ad tt-iwali kan 30 n ddqayeq deg wass. Maca tura yessutur-d ad tt-iwali s waṭas. Annect-a yettak-iyi lweqt d lehna akken ad fruɣ tilufa-w deg talwit. Maca aṭas i d-yeqqaren dakken ur ilaq ara ad yettɣimi ugrud aṭas ar tiliẓri. I wawalen-nni akk i la isell deg wass, ad t-iɛiwen deg usnerni n umeslay-is neɣ xaṭi ?

Ala. Takadimit n yimejjayen n yigerdan teqqar-d dakken ur tlaq ara tiliẓri uqbel 3 n yiseggasen. Tiliẓri mačči d ttawil n uselmed n tutlayin. Agrud-im yuḥwaǧ ad isel i umeslay n tidet u srid gar-as d yimawlan d wiyiḍ. Ameslay ur yesɛi ara azal ala ma yella tettmeslayeḍ srid yid-s ɣef wayen icudden ar wayen akk i as-d-yezzin. Agrud ur ifehhem ara ɣef wacu i ttmeslayen yiwudam i yettwali deg tiliẓri. Tameslayt n tiliẓri ur as-teshil ara. Rnu leswat-agi akk n tiliẓri, rradyu, tilifun … ẓẓait ɣef wallaɣ-is. Akken ula d tiliẓri akked uselkim. Ihi ur ilaq ara ad ten-yettferriǧ alma yesmed 3 n yiseggasen deg leɛmer-is d asawen.