10 n tɣawsiwin i tzemrem ad tent-txedmem deg uxxam kken ad tɛiwnem agrud deg ttrebga-s
Sewjed amkan s yiruka n lqedd-is, amedya, ma yella yebɣa ad yessired taẓrudyat neɣ tattefaḥt, ad yessiweḍ ad tent-yessired s sshala, ad yessexdem leqcuc-is imecṭuḥen. Mlet-as i ugrud amek ara ixeddem lecɣal amek ara yessirid tteqcir-is, ad yesfeḍ ṭṭabla mi ara yečč, ad ibeṭṭen lqecc -is .
Anfem-as ad yelmed s tuccḍiwin-is. Ur yezmir ara ad yewqem ccɣel-is am yimeqqranen, ad yelmed s leɛqel, yezmer ad iwezzeɛ aman ar lqaɛa, maca ɛiwnet-t ad ten-yekkes, ad ten-yesfeḍ, ur ten-seffḍet ara iman-nwen.
Sxedmem leqcuc d yirellucen i as-ilaqen. Ma yella agrud iḍegger irellucen-is init-as : « Ḥader irellucen-ik ». Ma yella yettɛawad-as kan ffɣet ɣer berra ad turarem ddabex.
Anfem-as ad yextir ayen isehlen amedya aɣrum s uguglu neɣ s wudi, tatteffaḥt tazegzawt neɣ tazeggaɣt.
Mmeslayem-as s ssfa d tidet. Agrud yuḥwaǧ ad as-temmeslayem s ssfa d tidet. Deg ubdil ad as-tinim : « telhiḍ i uɛiwen » init-as : « Tanemmirt imi d-tserseḍ ṭṭabla ay uḥric » deg ubdil ara tɛeyyḍem fell-as neɣ as-tinim ad d-iṣub sufella n ṭṭabla, refdem-tt, init-as : « iḍarren ttrusun ɣef lqaɛa mačči ɣef ṭṭabla »
Ur ilaq ara ad iḥus ugrud d akken ilaq ad ixeddem kan ayen i tebɣam. Agrud yuwiḍ ad yexdem ayen i iḥemmel diɣen. Imeqqranen ttwalim annect-a d axeddim ilaq ad yettwaxdem maca agrud yettwali-t d turart
Ddut-as deg tannumi i yennum. Agrud yuḥwaǧ ssaɛa n yiḍes, n wučči, lweqt d iyɛeggalen n twacult d turart yid-sen.
Xedmet tannumi i isuɛden akk tawacult, akken ad ten-ḍefren akk, ula d agrud ad yeḍfer akken..
Weznet yal tagnit uqbel ad txedmem kra. Ma yella agrud yerfa steqsit-t, ma yella yelluẓ neɣ yeɛya, ma yefqeɛ, yal tagnit s tririt-is.
Ilaq ad teẓrem dakken tiyita ur d-tettawi ara ayen yelhan. Tiyita ur tesɛi ara azal deg ttrebga, acku tettaǧǧa agrud ad ifek azal i wayen ur ilaqen ara ad t-yexdem wala i wayen i ilaqen ad t-yexdem, annect-a yeslalay-d uguren i ugrud, acku ad yecfu kan ɣef tyita-nni, maca itettu sseba i d-yuwin tiyita-nni.