Ameslay

Heggit-d annar n umeslay d amerkanti s wawalen

  • Kunwi d wid akk i ittekkin deg umaḍal n ugrud-nwen, d kunwi i d annar-is n umeslay. Ilaq ad ḥsun ula d nutni s wazal n umeslay i ugrud akken ad as-ttmeslayen ula d nutni s wawalen ara yefhem.

Snamet i ugrud ameslay ilmend n wayen i yettidir

  • Agrud yezmer ad yefhem aṭas seg wayen tettmeslayem kter n wayen i tenwam. Ihi, yelha ad as-tessefhamem azal n umeslay deg tudert-is akken ur yettnuɣni ara. Amedya mi ara tekkrem ad teffɣem ɣer berra, tzemrem as-tinim : « d asemmiḍ deg berra ass-a, ilaq ihi ad nels tikebbuḍin. Ad skecmeɣ afus-ik aẓelmaḍ deg yixef aẓelmaḍn tkebbuḍt-ik, ad d-nadiɣ ixef ayeffus akken ad skecmeɣ afus-ik ayeffus. »
  • Mi ara tettmeslayem, qablet agrud-nwen udem s udem, ur as-ttezzit ara s uɛrur neɣ ad tettmuqulem anda nniḍen. Yuḥwaǧ ad iwali allen-nwen, imi-nwen yerna ad d-isel i yimeslayen-nwen.
  • Erret ddehn-nwen ɣer ugrud-nwen mi ara yekkat ad d-yemmeslay. Ilaq ad tcekkrem, massit-t deg wudem neɣ zmumget-as yerna ttɛawadet-d i wayen i d-yenna.
  • Igerdan tteqqnen ismawen ɣer tɣawsiwin, yelha ihi ad sellen i yismawen n tɣawsiwin i ttwalin neɣ i ttmassin. Erret ddehn-nwen ɣer wayen i yettmassi ugrud, tinim-as ismawen-nsent. Mi ara iwehhi ɣer kra, efket-as isem-is, ttɛawadet-as-d kan alma yessen-it.
  • Skecmet-d awalen ijdiden deg umeslay. Ttɛawadet-asen-d acḥal d tikkelt akken ad yecfu fell-asen. Amedya ad as-tinim : « Tebɣiḍ ad teččeḍ tatteffaḥt ? Nesɛa titteffaḥin d tizeggaɣin. Ad teččeḍ tatteffaḥṭ tazeggaɣt ? »
  • Ulayɣer ad tesxedmem ipupilen i iheddren neɣ ad tesxedmem imeslayen-nni n warrac am « miɛɛu » neɣ minuc ». Agrud ifehhem imeslayen akken i ten-qqaren yimeqqranen, ad as-tiniḍ : « Amcic » mačči « minuc ». Ihi fiḥel akk lehḍur-nni n warrac. Ur tesɛiḍ iwacu-ten.

Afet-d lweqt

  • Xeddmet akka d ugrud-nwen yal ass.Annect-a ur yuḥwaǧ ara lweqt-nniḍen, dacu ilaq ad tsebrem u ad tsaɛfem agrud. Mačči ma tsemmam-d kan i kra n tɣawsa, agrud ad yizmir ad d-iɛawed isem-is deg tikkelt tamezwarut. Ilaq lweqt akken taqemmuct-is ad tennam u ad tizmir ad t-id-tessenṭeq akken ilaq. Maca mi ara terrem ddehn-nwen ɣur-s, ad t-tettcekkirem ɣef wayen i ixeddem, ad d-ittɛawad i wawalen-nni cwiṭ cwiṭ, alma yuɣal yettmeslay akken ilaq.