Rreḥba n yiseqsiyen ɣef tbadut n tlisa

Agrud-iw ur iḥemmel ara akk ad d-yennejmaɛ s axxam

Ḥemmleɣ ad ruḥeɣ ɣer tmeddakelt-iw akken ad turar yelli d yelli-s, maca tameddit mi ara nekker ad d-nuɣal, yelli tettagi ad d-teddu, dɣa ttafeɣ-d iman-iw ḥareɣ sdat-s mi ara tettru, dɣa bessif ad tt-id-refdeɣ akken ad tt-id-awiɣ yid-i. Amek ara xedmeɣ akken ad as-sfehmeɣ belli ula d turart tesɛa tilisa akken ur d-ttilint ara tegnatin-a n leɛyaḍ d unuɣni?

D tignatin i yuɛren akken ad tent-iɛeddi yiwen. Tifrat, ilaq ad t-tɛiwneḍ akken ad yefhem d acu i d-itteddun ɣer sdat. Ini-as xersum 15 n ddqayeq uqbel ad tekkrem ad truḥem akken ad tẓer ayen i d-itteddun. Mi d-yuweḍ lawan, ini-as: “D lawan ad nruḥ tura, ad d-nuɣal ɣer tmeddakelt-im tikkelt-nniḍen”. Ma yella ur tebɣi ara ad teddu, sextir-itt: “Tebɣiḍ ad tedduḍ ɣer tkerrust, neɣ ad kem-refdeɣ?” neɣ “Tebɣiḍ ad yi-teṭṭfeḍ afus, neɣ ad tawiḍ lsak?” Yezmer mazal ur tettḥekkim ara mliḥ deg yiman-is akken ad tizmir ad texdem ayen ara as-tiniḍ, u annect-a yuḥwaǧ lweqt i ugrud amecṭuḥ akken ad yefhem u ad yizmir ad yexdem ayen i as-tessutreḍ, ihi ur ttraju ara tiririt sɣur-s imir-nni kan. Syin akin mi i as-tefkiḍ lweqt, ma yella ur d-teddi ara, ilaq ad tt-tawiḍ, ini-asen ar timlilit, truḥemt. Igerdan yesɛan ddaw n 3 n yiseggasen fehhmen mliḥ tigawin wala imeslayen, ur ilaq ara ad ternuḍ ad tettemjaḍaleḍ yid-s kter, acku ma yella tettemjaḍaleḍ yid-s, d ayen ara as-d-yefken asirem belli ad as-tedduḍ di lebɣi, u d annect-a i izemren ad d-yexleq iɣisi (icerrig) gar-am d yid-s.

Agrud-iw yettagi ad yurar d yigerdan-nniḍen

Agrud-iw ur iḥemmel ara ad yurar d warrac-nniḍen, tikwal mi ara yili kra n umeddake, turart-is tettfakka s yimeṭṭawen. Amek ara as-xedmeɣ akken ad fruɣ aɣbel-a?

Ilaq ad as-temleḍ lqaleb yelhan i turart akken ad yetturar d yigerdan-nniḍen. Amedya, ma yella iṭṭeggir rrmel mi ara yetturar d kra n umeddakel-is, mel-as amek ara yessexdem aɣerbal d yirellucen-nniḍen n rrmel, tesfehmeḍ-as diɣen s wawal am: “rrmel-a i turart”. Ḥader ad ak-yekcem ɣer wallen-ik.” Ma yella mazal iṭṭeggir rrmel, kkes-it-id syinna, efk-as ad yurar ayen-nniḍen, amedya, ad isew ijeǧǧigen. Ma yella yettru, yugi ad yedhu, kkes-it syinna diɣen. Nekkni s yimeqqranen, neẓra melmi i nebɣa ad nḥewwes, neɣ melmi i nebɣa ad neqqim iman-nneɣ akken ad nesteɛfu. Igerdan, ur ssinen ara amek ara xedmen, daymi i ḥwaǧen lemɛawna-nneɣ. Efk-as tameẓẓuɣt, lwelha-m d leḥmala-m mi ara yettru akken ad d-yessuffeɣ ayen i t-iqerḥen. Mi ara yekkfu imeṭṭawen, yessuffeɣ-d iḥulfan-is, tqebleḍ-ten, tefkiḍ-as leḥmala d leḥnana yerna teṭṭfeḍ deg wawal-im deg wayen yerzan tilisa-s.