Ameslay

Heggit tawennaḍt yelhan akken ad teslem u ad terrem awal

• Agrud-nwen ad ittekki mi ara yekcem gar yimdanen-nniḍen deg tudert-is. Ur tettut ara dakken imeqqranen akk i d-ikecmen deg tudert-is d nutni i d tawennaḍt-is n tmeslayt akked kunwi diɣen. Ihi ilaq ad tseḥbibrem akken wigi akk ad as-ttmeslayen s tmeslayt teshel u tettwafham.
• Ɛasset akken wid akk ukkud yesɛedday lweqt-is ad fehmen azal n tririt mi ara yebɣu ad d-yini kra neɣ ad yemmeslay deg lawan-nni. Ad as-yaɛer dacu mi yufa-d tiririt ad ibɣu ad ikemmel, maca ma yella yiwen ur as-yefki udem ad yenwu dakken ayen akken i ixeddem ur yemɛin ara dɣa ad yefcel, ad iḥbes ur ihedder ara.

Aṭṭerḍeq n tmeslayt ɣer ugrud

• Semmit-d akk i tɣawsiwin yellan deg texxamin n uxxam : ismawen n tkuzint, ismawen n tzeqqa n tarda d ucucef, ismawen n texxamin, … Sxedmet amawal iseḥḥan, mačči kan awalen imatuyen, maca ula d awalen yeɛnan kra tɣawsiwin tuzzigin am : « Taɛessart », rridu n tzeqqa n ucucef ».
• Ma yella agrud yesseɛwaj awalen am : « pasgiti », erret-as s wawal iseḥḥan, bla ma ifaq belli tesseɣtam-as-d : « Ih, ntett spagiti i yimekli ». Ur d-ttɛawadet ara i tuccḍiwin-is, yerna ur ttaḍsat ara fell-as. Mi ara d-tɛiwdem i wawal iseḥḥan neɣ mi ara tkemmlem yid-s ameslay, ad t-tɛiwnem akken ad yissin awal-nni yerna ad yettmeslay akken ilaq.
• Asmi ara yesmed ugrud-nwen azal n 50 n wawalen deg tmeslayt-is, ad yebdu ad ixeddem tifyar n sin neɣ tlata n wawalen. S umata s lebni iseḥḥan (amyizwer n wawalen), amedya : « rnu-yi-d le jus », erret-as s tefyirt yemmden : « ih, tura ad ak-d-rnuɣ le jus. »
• Ur as-sseɣtayet ara mi ara yessexlaḍ gar yilugan, am : « kkreɣ ad ṭṭseɣ » neɣ kkreɣ-d ». mi ara yessexdam kra n walug n tseddast am tmerna n ad akken ad d-imel ayen i d-itteddun ɣer sadt, annect-a yeskan-d belli yefhem amek i tetteddu tutlayt, xas ur yessin ara bli llant tsuraf. Yelha ad tkemmlem ameslay yid-s wala ma tḥebsem-t-id as-tinim : xaṭi, mačči akken »
• Amedya-nniḍen n usexleḍ d imi ara yesdukkul imdanen neɣ tiɣawsiwin deg yiwen lmul : irgazen akk d ibabaten, iɣersiwen akk i itteddun ɣef rebɛa n yiḍarren d iqjan. Yesdukkul tiɣawsiwin deg wallaɣ-is s ssifa i asent-yettak. Tzemrem ad tɛiwnem deg taluft-a, ad as-tefkem uraren ara d-ijemɛen tiɣawsiwin d taggayin, yal ssenf iman-is. Fernet tiɣemǧawin d tfurciḍin, tiktabin timeqqranin d tmecṭuḥin, tibluzin d tserwula.

Efket lweqt akken ad teslem u ad as-terrem

• Kemmlet akken, sellet-as ternum-as awalen imaynuten akken ad yesnerni lefhama-s i d-yettlalen. Agrud ad ikemmel ad yebɣu ad yemmeslay mi ara as-tefkem lweqt ad as-theddrem u ad as-tsellem.