Ɣer timucuha, cnu tizlatin
Snulfu-d tamurt yeččuren d timucuha d tezlatin
- Tzemrem ad as-tesnamem idlisen (tiktabin) deg tudert-is uqbel akk ad yizmir ad yefhem tteswirat neɣ awalen i yellan daxel-is. Xedmet-as leqjer i yidlisen deg texxamt-is, ternum-as takursit yelhan i tɣimit akken ad yeqqar deg talwit.
- Awit-as-d idlisen i d-iḥekkun ɣef tedyanin i izemren ad ḍrunt deg tudert n ugrud. Tiqsiḍin n twacult d teqsiḍin n tudert n yal ass.
- Awit-as-d tiktabin i yesɛan tteswirat d timeqqranin rnu sfant.
- Awit-as-d tiktabin i yessexdamen imeslayen neɣ tinfaliyin i d-yettuɣalen; sehlent ad tent-yefhem u ad d-jebbdent lwelha-s.
- Awit-as-d idlisen melba awalen, neɣ tiktabin s yiwet n tteswira d tameqqrant i yesɛan kan yiwen wawal.
Snamet i ugrud-nwen timucuha d tezlatin
- Qqaret-as-d timucuha yal ass. Acku imusnawen qqaren-d dakken igerdan i wumi d-qqaren yimawlan-nsen timucuha xas 10 ar 20 dqayeq deg wass, ttuɣalen ḥemmlen taɣuri seg temẓi.
- Cnut-as-d ccnawi d tezlatin i tessnem seg wul. Ma yella ur tessinem ara, aɣet-d kra n uḍebsi n tezlatin i imucaɛen aṭas, slet-as, tḥefḍem tizlatin i yellan deg-s akken ad tent-id-tcennum kunwi, fiḥel aḍebsi-nni, acku, ulac i yifen taɣect-nwen wala tin n uḍebsi.
Sɛut lweqt ilaqen akken ad teqqarem u ad tcennum d ugrud-nwen.
- Erret taɣuri d ccna d aḥric agejdan deg tudert n ugrud akken ad yili d azuzen ad yeṭṭes, neɣ d tagnit kan n usteɛfu akken ad tt-tesɛeddim d ugrud-nwen.
Amedya n ccnawi i uzuzen n ugrud
Azuzen 1: Ers-d ers-d
Ers-d, ers-d ay iḍes
Mmi yebɣa ad yeṭṭes
Ur t-ittaɣ ur t-ibellu
Ala lxir deg wul-ines
Imeṭṭawen-nni ara iru
Ad ten-iru uɛdaw-ines.
Azuzen 2: A lmalayek
A lmalayek a tiḥbibin
Zuznemt mmi di dduḥ
Ad kent-awiɣ d tiwiziwin
Tin yi-dyeslan ɣur-i ad d-truḥ
Awimt-d lehna i uḥnin
D llufan mazal mecṭuḥ.