10 n tlufa i tzemrem ad tent-txedmem deg uxxam akken ad tɛiwnem agrud akken ad yemmeslay
Xleq-d tawennaḍt (amkan) irekden ideg tella tsusmi, tesseḥbibrem ɣef ugrud deg leswat n diri. Sneqset i ssut n tiliẓri akken ad d-tres tsusmi. Ilaq ala taɣect n umdan i wumi ara isell.
Ttmeslayet d ugrud-nwen. Mi ara d-ixdem kra n ssut, ilaq ad as-terrem amzun yettmeslay-d yid-wen. Leswat-nni ttuɣalen d amuɣu, d wigi i d imeslayen-is imezwura. Ttmeslayet-as ṭul n wass, ula d inebgawen i d-yettasen, init-asen ad ttmeslayen yid-s akken.
Qqaret-as-d timucuha d yisefra, cnut-as-d tizlatin. Igerdan lemmden amawal yelhan, u ttissinen taɣuri ma yella nnumen taɣuri s waṭas. Ḥemmlen ad slen i tmacahut-nni i wumi slan yakan. Nadit-d idlisen i icudden mliḥ ɣer wayen i ttidiren yigerdan, wid i yesɛan tteswirat isehlen akken ad tent-fehmen. Cennut-asen-d tizlatin i ḥemmlen s waṭas.
Ttmeslayet s ssfa u srid mebla tuzzya deg wawal. Sfehmet-as ma yella ixaq sya ar da. Ttmeslayet yid-s, ḥekkut-as-d timucuha. Yelha diɣen ad terrem ddehn-nwen mi ara d-yini kra, ad as-tezmumgem u ad tferḥem yid-s neɣ ad d-tettɛawadem i yimeslayen i d-yenna.
Ur ssexdamet ara ipupilen i iheddren. Ur d-snulfuyet ara imeslayen-nni zeɛma n yigerdan. Ma ulac ad yekcem deg yimeslayen-nni n ugrud ur sɛin lmeɛna. Ilaq ad isel i yimeslayen iseḥḥan akken i ten-heddren yimeqqranen. Mi ara tettmeslayem d ugrud, ili-ken srid, ad ibin dacu i tebɣam ad as-t-tinim. Itteqqen ismawen ɣer tɣawsiwin, ihi ilaq ad isel i yismawen n tɣawsiwin i yettwali neɣ i yettaṭṭaf.
Ttarrat-as mi ara yebɣu ad d-yemmeslay. Tiririt-nwen ad t-tɛiwen akken ad iɛeddi seg uwehhi s yifassen ɣer wawalen. Ad ifhem dakken ayen ixeddem yettawi-d lfayda. Mi ara tsellem i ugrud u ad as-tettarram, qqaret-as: imeslayen-ik acek-iten, gerrzen. D ayen ara t-yeǧǧen ad ikemmel ad yekkat ad yettmeslay kter.
Ssexdamet awalen yelhan, seḥḥan. Mačči kan d awalen n yal ass, maca ula d awalen nniḍen. Mlet-as ismawen n wyen akk yellan deg texxamin n uxxam. Awalen n tkuzint, awalen n tzeqqa n ucucef, awalen n texxamt n yiḍes...
Ur d-ttɛawadet ara anda i d-yeɣleḍ neɣ ad teḍsem fell-as. Ma yeɣleḍ-d deg wawal, seɣtit-as ad t-id-yini akken ilaq. Ma yenna-d: bɣiɣ qaqqa, init-as ad d-yini : bɣiɣ leḥlawat. S wakka ara yelmed anamek n wawalen u ad ten-id-yeqqar akken iwata.
S nnuba, ḥekkut-as-d timucuha. ḥekkut-as-d timucuha n yal ass mačči kan tid n yidlisen (tikabin). Igerdan ḥemmlen timɛayin i d-iḥekkun ɣef tudert-is n yal ass. “Tekkreḍ-d tasebḥit, telsiḍ taserwalt-ik tazegzawt, d tetrikut-ik tamellalt, tessardeḍ tuɣmas-ik...“
Efk-as lweqt ilaqen akken ad as-teslem. Ilaq ur tetqelliqem ara. Xas ur tfehhmem ara d acu i awen-d-yeqqar. Ur t-id-ḥebbset ara, ur as-gezzmet ara awal neɣ ad as-d-teqqarem awalen-nniḍen. Eǧǧet-t ad d-yekfu awal-is. D annect-a ara t-iɛiwnen akken ad ikemmel ameslay-is.