Rreḥba n yiseqsiyen ɣef wučči

Agrud-iw ur itett ara

Zgiɣ sewwayeɣ-as-d tigelliwin yemxallafen i umecṭuḥ-iw. Yerna zgiɣ xeddmeɣ-as-d ayen i iḥemmel. Yal tikkelt seqsayeɣ-t dacu i yebɣa ad t-yečč akken ad as-t-id-xedmeɣ b ddema i netta akken ad yečč. Rnu yesɛa ṭṭabla-s d tkursit-is iman-is deg tkuzint anda lliɣ akken ad rreɣ ddehn-iw ɣur-s, dacu netta yezga yettwexxir ɣef wučči, yettruḥu ad yurar s yirellucen-is. Dacu ara as-xedmeɣ akken ad yečč ?

Učči d tidet d tagella yelhan mliḥ akken ad yimɣur ugrud u ad yennerni, dacu diɣen d tannumi. Ula d nekkni s yimeqqranen mi ara ntett iman-nneɣ yettruḥu-aɣ lebɣi-nni n wučči. Ihi ula d agrud mi ara itett iman-is yal tameddit, ittxiqi daymi ur as-yetteɛǧab ara lḥal daymi i yettḥaz iman-is akken ad yurar s yirellucen-is. Ahat terram lbal-nwen bli iḥemmel ad yečč mi ara yili walbeɛḍ sdat-s. ihi yelha mi ara itett akked twacult deg yiwet n ṭṭabla. Ahat ur tezmirem ara yal ass, imi ilaq ad d-tafem lwaeqt akken ad teqqimem ɣer ṭṭabla u ad teččem yid-s. ad teẓrem dakken simal iseɛɛu lebɣi akken ad yečč s lferḥ mi ara as-d-zzin wid i iḥemmel..

Melmi ara as-bduɣ učči i ugrud ?

Ɛewqeɣ deg wayen i d-qqarent tektabin d wayen i d-heddrent temɣarin d wayen i qqareɣ deg uẓeṭṭa n internet. Melmi ara tefkeḍ i ugrud ayen-nniḍen ur nelli ara d ayefki ?

Ilaq ad tḍefrem mliḥ taneflit n ugrud-nwen. Di tazwara ur yezmir ara ad isew neɣ ad yečč kra nniḍen ala ayefki. Yerna ayefki n tyemmat yelha-as mliḥ i unerni n tfekka-s. maca asmi ara yebdu yessemɣay-d tuɣmas , yezmer ad yečč ayen ara iẓed s tuɣmas-is, u asmi ara yizmir ad yeṭṭef tiɣawsiwin gar yifassen-is yezmer ad yečč s yifassen-is.

Nniɣ-as ur ilaq ara ad nefk lemwas i warrac imecṭaḥ, ma ulac ad leḥqen iman-nsen

Ḥemmleɣ aṭas tiktiwin-nwen akken ad tɛiwnem agrud amek ara iheggi učči-ines. Annect-a iɛawen-iyi aṭas akken ad waliɣ amek ara xedmeɣ i teqcicin-iw, maca ur qbileɣ ara tikti-agi n lmus neɣ n lkas i teqcict. I limer ad as-yeɣli u ad irreẓ, yezmer ad tt-id-yejreḥ ?

Ih, tesɛiḍ lḥeqq ma tuggadeḍ. Ur nennum ara nettak tiɣawsiwin yuɛren i yigerdan. Maca deg tidet, tiɣawsiwin-agi uɛrent kan mi yella ur nessin ad tent-nessexdem. Ihi ilaq qbel ad as-nmel i ugrud amek ara yeṭṭef lmus d wamek ara t-yessexdem akken ur t-ijerreḥ ara. Mel-as s leɛqel, yal lḥaǧa iman-is akken ad iẓer amek ara yexdem. Bdu s lmus ur qeṭṭiɛen ara yerna ur yesɛi ara ticcert. Xersum yezmer ad yegzem tabanant. Syin akkin efk-as lmus qeṭṭiɛen asmi ara tizmir ad t-tessexdem akken laq deg laman iwakken ad tegzem lxeḍra. Kifkif, asmi ara as-nmel i ugrud amek ara yessexdem lkisan n djaja, yezmer ad ten-yettruẓu ussan-nni imezwura, syin akkin ad yefhem belli lkas yettruẓu mi ara as-yeɣli ɣer lqaɛa. imir-nni ad yuɣal ad yetḥekkem deg yifassen-is akken ur as-iɣelli ara. Ma yella tefkiḍ-as lkas n plastik neɣ n lkaɣeḍ ur yezmir ara ad yissin annect-a.