Isteqsiyen ɣef yiḍes

Agrud-iw yessawal-iyi-d acḥal d abrid deg yiḍ uqbel ad igen

Nesɛa tannumi n yiḍes telha. Seld asucef, agrud-iw ad yesɛeddi azgen n saɛa seg turart s yirellucen-is, umbɛed ad as-d-siwleɣ tamacahut daxel n wusu-s uqbel ad igen. Maca ɣas akken ur yeggan ara imir-n, yessawal-iyi-d 4 ar 5 n tikkal yal iḍ akken ad iyi-isuden neɣ ad d-isuter tamacahut-nniḍen. Annect-a yettaṭṭaf ssaɛa neɣ kter yal iḍ uqbel ad igen.

Yelha imi i as-txedmeḍ lweqt ara yennam i yiḍes, yettban d akken tesnumeḍ-as tettuɣaleḍ ar ugrud-im 4 ar 5 n tikkal deg yiḍ mi ara d-yessiwel. Ma yella ur tebɣiḍ ara annect-a ad d-yettuɣal yal iḍ, ilaq ad as-tiniḍ ur am-d-yessawal ara, amedya ad as-tiniḍ « d tamacahut taneggarut i yiḍ-agi », neɣ ad as-tiniḍ « uqbel ad ruḥeɣ yella kra i tebɣiḍ akken ur d-ttuɣaleɣ ara. » Deg tazwara ad yettru, neɣ ad yerfu maca ad yuɣal ad yegzu dakken dayen ur tettuɣaleḍ ara ɣur-s ɣef tmacahut tis snat neɣ asuden, ad yeqbel, ad yefhem iman-is alma igen.

Asnerni n tnumi yelhan n yiḍes seg tazwara

Qrib ad d-rbuɣ agrud-iw amezwaru bɣiɣ ad t-ɛiwneɣ ad yesnerni seg tazwara tannumi yelhan n yiḍes. Sɛiɣ timeddukkal ilaq ad d-gnent d yigerdan-nsent yal iḍ acḥal n swayeɛ uqbel ad gnen. Amek ara beɛdeɣ ɣef wannect-a ?

Ayen yezwaren ilaq ad tɛiwneḍ agrud ad yesnerni tizemmar-is ad yeggan seg tazwara. Ɣef waya, ilaq ad t-teggareḍ ɣer wusu-s akken yuki ur yeṭṭis ara. S wakka ad yennam ad yeggan iman-is. Ma yella yennum iḍess uzuzen deg yifassen-im ad as-yaɛar yiḍes iman-is. Ma yella tkeslem-t deg wusu-s akken yuki ad t-tzuzneḍ s uẓawan , ad yennam ad yeggan iman-is seg tlalit-is.

Agrud-iw yettlaẓ deg yiḍ

Agrud-iw n 8 wagguren ittekkar-d 2 ar 3 n tikkal deg yiḍ akken ad yečč. Xas akken yečča akken ilaq deg wass, maca yezmer ad yellaẓ deg yiḍ ?

Ma yella agrud-im yečča akken ilaq deg wass akken i d-tenniḍ, ur yuḥwaǧ ara ad yeṭṭeḍ 2 ar 3 n tikkal deg yiḍ deg leɛmer-agi. Neɛa akk tannumi i nettabaɛ deg yiḍes. Nekkni s yimeqqranen nettaki nqelleb idis nettuɣal ar yiḍes yerna ur nettfaq ara dakken nekker-d. Mi ara d-yekker ugrud ilaq ad yennam ad yettuɣal ar yiḍes iman-is. Ugur yettnerni mi ara as-nettarra awal mi ara d-yekker, neɣ ad as-nefk ad yeṭṭeḍ. Annect-a yettuɣal-as d tannumi amek ara yettuɣal ar yiḍes. Tifrat yelhan ilaq ad tḥebseḍ ur t-tseččayeḍ ara deg yiḍ, maca tura imi yuɣ tannumi ad yaɛar akken ad tt-yekkes yiwen. Mi ara d-yekker ruḥ ɣur-s maca ur t-id-reffed ara deg wusu-s. Di tazwara yezmer ad d-yettaki acḥal d abrid maca ur t-id-reffed ara, ur t-seččay ara, cwiṭ cwiṭ ad yuɣal ur d-yettaki ara s waṭas, ad yuɣal ad yeggan iman-is.

Agrud-iw yettaki ṭul n yiḍ

Agrud-iw yeqleb iḍ d wass, yettaki deg yiḍ yeggan deg wass. Amek ara xedmeɣ akken ad as-beddleɣ annect-a ?

Neẓra dakken deg yiḍ ad ngen mi ara d-yeɣli ṭṭlam, ad nekker deg wass ; nekkni s yimeqqranen, s umata akka i nxeddem. Imi agrud mi ara d-ilal i tikkelt tamezwarut, yella yesɛedda 9 n wayyuren, igen iḍ d wass. Ilaq ad nɛiwen agrud ad yeqɛed iḍes-is akken ad d-yettaki deg wass ad yeggan deg yiḍ. Akken ad yennam annect-a, ilaq ur t-nettaǧǧa ara ad igen deg wass ad t-nessedhu, deg yiḍ ad igen, arma yennum tukkra deg wass, iḍes deg yiḍ.