Rreḥba n yiseqsiyen ɣef wayen i yeεnan lxetyarat

Iban-d d akken agrud-iw ur yessin ara ad yefren lxetyar yelhan

Beqquɣ ad ǧǧeɣ yelli ad textir iman-is ,maca tezga tettextiri ayen akken ur rjiɣ ara akk deg-s ad t-textir. Dɣa , qqareɣ-as belli ur tezmir ara ad texdem akken, maca ilaq ad texdem ayen-nniḍen. Tikwal tferreḥ, maca tikwal-nniḍen, tettfakka s yimeṭṭawen daymi ttendemmayeɣ imi tt-ǧǧiɣ ad textir nettat. Amedya, tikwal di tḥanut, qqareɣ-as tzemreḍ ad d-textireḍ lfakya ara nawi s axxam, dɣa tettextiri-d ayen akken ur tḥemmel ara, ihi ttagiɣ ad t-id-aɣeɣ imi ẓriɣ d aḍegger kan ara yettwaḍegger. Ad as-d-sumreɣ ayen-nniḍen dɣa ad tgammi ad t-tečč imi nettat textar ayen-nniḍen. Amek i zemreɣ ad tt-ɛiwneɣ akken ad tettextiri ayen isewben?

Llant dagi snat n tlufa ilaq ad asent-imeyyez yiwen. Tamezwarut , ilaq ad teǧǧeḍ yelli-m ad textir gar waṭas n lxetyarat yerna akken bɣun ilin, ilaq ad teḥsuḍ belli win tebɣu textar-it ad tferḥeḍ yis-s. Mi ara as-tefkeḍ aṭas n lxetyarat, dinna ad teɛweq dɣa ad textir kan akka ilmend n wayen i d-ijebbden lwelha-s. Tis snat, mayella ad tt-teǧǧeḍ ad textir iman-is, ilaq adiɣen ad tt-teǧǧeḍ ad temger lɣella n wayen i textar. Tzemreḍ ad as-tiniḍ: “Ur ḥsiɣ ara tḥemmleḍ lfakya-agi a yelli”, maca ma yella tugi ad tebru i wawal-is, anef-as akken ad twali s yiman-is. I yigerdan, tirmit tesɛa azal d ameqqran. Tikkelt-nniḍen ad tecfu belli ur as-teɛǧib ara lfakya-nni dɣa ur tettuɣal ara ad tt-id-tawi. D tamsirt lɛali yifen akk imeslayen ara as-tiniḍ.