Eǧǧ agrud ad ixdem tuccḍiwin

Snulfu-d tawennaḍt s leɛqel d umeyyez ɣer tuccḍiwin

• Tuccḍiwin ttekkint deg umecwar n leqraya d leḥfaḍa. ladɣa mi ara tent-nqabel s ssber d leɛqel mebla acennef. Igerdan imecṭuḥen uḥwaǧen aṭas n lxedma mi ara lemmden akken ad xedmen kra d ajdid. Ilaq lweqt akken agrud ad yečč mebla ma yessenɣel ɣef lqecc-is, neɣ ad yissin anta tasebbaḍt i d-yezgan i uḍar-is.
• Mi ara neǧǧ igerdan ad xedmen tuccḍiwin, ttḥussun belli ttwaqeblen u ttwaḥemlen mebla ccerṭ, acku tayri ur tettwaqqen ara ɣer wayen i xeddmen. Ayen i zemren ad t-xedmen neɣ amek ara t-xedmen, mačči d ayen i zemren ad tḥekkmen deg-s seg tazwara. Ma yella neḥres-iten ɣef wayen i wumi ur zmiren ara ur ttḥussun ara s laman

Mlet-as i ugrud amek ara yesɛu tamuɣli yelhan ɣef tuccḍiwin-is

• Qeblet belli mazal-it la ittissin Yezmer ad tennuɣnim mi ara ken-yettɛawan ugrud deg ujmaɛ n leqlul, dɣa ad as-teɣli tḍebsit ad terreẓ. Maca ma yella tfeqqɛem, dayen ur yettuɣal ara ad t-yexdem tikkelt-nniḍen. Ihi, ilaq ad nesɛu tamuɣli yelhan ɣur-s,ad as-nini: “Ulac fell-as a mmi, yya-d ad d-nawi lbala ad nejmeɛ ddjaj-agi”. S wakka, xas ad nḥus belli ur yebɣi ara ad ten-yejmeɛ, maca iḥeffeḍ, s wakka ara yettwasebɣes akken ad ikemmel ad ittseggim kter. Simal ixeddem, simal ad ittissin ad itḥekkem deg yiman-is.
• Ur ilaq ara ad tekkem nnig-s Ahat yuɛer lḥal mi ara tbeddem ad tettmuqulem deg ugrud yettnaɣ akken ad yexdem kra i tzemrem kunwi ad t-txedmem s shala. Maca ur ittissin ara alma yefka lǧehd-is netta. Mi ara d-nger iman-nneɣ akken ad d-nekk nnig-s, amzun akken neqqar-as belli netta ur yezmir ara ad t-yexdem u ma yella yal tikkelt akka, dɣa ad ad yefcel ur ittuɣal ara ad yexdem kra.

Efket-as lweqt

• Ilaq-as lweqt akken ad iseggem kra u ad t-yexdem mebla tuccḍiwin. Ma yella yettwasebɣes akken ad ikemmel ad ixeddem kra n tɣawsa acku ur tettqejjimem ara deg-s neɣ ur as-tesseɣtayem ara tuccḍiwin-is, ad isnerni deg-s tamuɣli yufraren akken ad ikemmel ad ixeddem iman-is.