Rreḥba n yiseqsiyen ɣef llebsa
Ulac aṭas n lweqt deg wass
Bɣiɣ ad yebdu ugrud-iw ad yettlusu lqecc-is iman-is, dacu annect-a yettɛeṭṭil-iyi dɣa ttkemmileɣ-as nekki acku ur sɛiɣ ara aṭas n lweqt. Amek ara yizmireɣ ad t-ɛiwneɣ deg timanit-is deg cwiṭ n lweqt i yi-d-yettɣiman deg wass ?
D tidet, ilaq aṭas n lweqt akken ad iles ugrud iman-is wala ma tselseḍ-as kemm. Ihi tesɛiḍ sin iberdan : xtir kan ad tettekreḍ zik neɣ ad as-teslusuyeḍ kemm. Abrid-a wis sin, lmeɛna-s ad tekkfuḍ deg lweqt, maca agrud simal yettimɣur simal ad ibeqqu ad ixeddem tilufa-s iman-is, annect-a ad as-yuɣal d iɛewwiq. Ihi tifrat yelhan, ma yella ur tesɛiḍ ara aṭas n lweqt, xersum af-d tignatin dlewqat i tessagreḍ akken ad temleḍ i ugrud amek ara yexdem tilufa tifessasin tisehlanin. Sken-as, tɛawdeḍ-as-d asurif amezwaru acḥal d tikkelt akken ad yecfu, syin eǧǧ-it ad as-d-iɛawed iman-is. Segger-it, sebɣes-it akken ad yexdem asurif amenzu iman-is. Ma yella yeɛya, xas xdem-it kemm. Cwiṭ cwiṭ, ad yuɣal ad as-yeɛǧeb lḥal, ad iḥemmel ad iles iman-is. Yiwen n uwellih kan, ur ttḍeggiret ara lweqt-nwen ma yella ur yebɣi ara ad iɛaned. Sefhem-as kan belli ass-a ad t-tɛiwneḍ acku tesɛid ccɣel i k-yettrajun, ur ilaq ad tɛeṭṭleḍ.
Amek ara ḥsuɣ belli wiyiḍ diɣen akka ara xedmen ?
Qqimeɣ aṭas n lweqt akken ad as-mleɣ i ugrud-iw amek ara yels lqecc-is iman-is, ula d netta yuɣal ixeddem akken, yerna iɛǧeb-as lḥal mi ara yels isebbaḍen-is iman-is. Maca tura, mi d-ffɣeɣ seg uxeddim, tameṭṭut i t-yettɛassan, ufiɣ d nettat i as-ixeddmen kullec. Dɣa yuɣal ur iḥemmel ara akk ad yexdem iman-is. Mi ara as-iniɣ ad iles isebbaḍen-is akken ad neffeɣ yettagi, yeqqar-iyi-d : « a yemma, sles-iyi-ten-id kemmi ». Amek ara xedmeɣ ihi ?
Daymi i yelha ad temsefhamem ɣef yiwet n tikli. Yerna ur ilaq ara ad d-tbineḍ amzun akken ur as-txeddmed ara ayen akken i yebɣa skud llan wid ara as-itteddun deg lebɣi mebla ma yexdem netta kra. Ihi tzemreḍ ad d-textireḍ kra n tlufa iɣef ara temsefhamem ad tent-txeddmem yal smana. Amedya, tzemreḍ ad tɛasseḍ ma yezmer ad iles ičeqciren-is, neɣ takebbuḍt-is neɣ tatrikut-it seg sya ɣer taggara n ddurt. Mɛawanet, xedmet kifkif-nwen ayen ara t-iɛawnen akken ad yissin amek ara ixeddem tilufa-s akken ilaq, temmeslayem yal ass ɣef wayen i yelhan d wayen i ixussen mazal ur yessaweḍ ara ad t-yexdem.
Ur ẓriɣ ara ma yella nettaẓ deg wayagi neɣ xaṭi.
Ḍefreɣ iberdan-agi akken ad ɛiwneɣ agrud-iw akken ad yissin ad iles lqecc-is. Llan wussan ideg yessaweḍ ad yels isebbaḍen-is neɣ takebbuḍt-is iman-i, llan wussan-nniḍen ur yessaweḍ ara. Wissen ma yekkat kan ad d-yejbed lwelha neɣ ulac fell-as?
Igerdan ttnernin s ttawil, ulac fell-as ma llan wussan anda ur yezmir ara ad yexdem tilufa-s iman-is xas yella ixeddem-itent yakan. Tikwal annect-a ittekk-d seg ɛeggu neɣ iwakken kan ad d-jebden lwelha-nsen. Ula d nekkni s yimeqqranen, llan wussan ideg i aɣ-tḍerru akka. Ihi yuwi-d ad tɛiwneḍ agrud mi ara yili yuḥwaǧ lemɛawna. Maca seggre-it kan akken ad yezger i uɛewwiq-nni i d-yemmugger syin anef-as ad ikemmel iman-is. Acku aɛiwen akken ad yizmir i yiman-is d tagnit yelhan, mačči d tagnit n umennuɣ.
Agrud-iw ur d-yettextir ara lqecc-nni i bɣiɣ ad ten-id-yextir
Agrud-iw iḥemmel ad d-yextir lqecc i yebɣa netta. Ma d tanekkra n ssbeḥ d tuffɣa ur sɛiɣ ara aɣbel deg-s. Maca tikwal ittextiri-d lqecc ur neddi ara d tegnit-nni. Amedya, ad tebɣu ad tles taqendurt mi ara yili nebɣa ad nruḥ ɣer lexla. Neɣ taqendurt n unebdu netta d asemmiḍ deg berra. Amek ara xedmeɣ ihi? Tikwal xas ad as-d-fkeɣ kra n lqecc akken ad yextir, maca yettaɣ-it ujenniw ɣef wayen i yebɣa kan netta. Ur bɣiɣ ara ad yennam ad ixeddem kan rrayis. Dacu i d tifrat ihi ?
D ayen yelhan imi aheggi-agi d wa i d tasarut n rbeḥ. Dacu ilaq ad theggim lqecc kan i yerzan tallit-nni. Deg texzant ilaq ad tsersem deg unebdu ala tiqendyar n unebdu. Deg ccetwa, ala lqecc n ccetwa. Akka ayen i yebɣu yextar-it ad d-yas yelha. Ih, tikwal ahat ur am-yetteɛǧab ara wayen ara yextir, dacu ilaq ad t-tqebleḍ.